તાજેતરમાં અમદાવાદ શહેરના રસ્તા પર વાહનોની ભરમાર જોવા મળે છે. તેથી રસ્તા પર ટ્રાફિકની સમસ્યા વધી છે. તેથી ટ્રાફિક સમસ્યાને દૂર કરવા અમદાવાદ મ્યુનિસિપલ કોર્પોરેશને શહેરમાં ચાર સ્થળ પર મલ્ટિલેવલ કાર પાર્કિંગ બનાવવા નિર્ણય કર્યો હતો. જોકે હવે એ નિર્ણયમાં ફેરબદલ કરી મલ્ટિલેવલ પાર્કિંગની સાથેસાથે કોમર્શિયલ સેન્ટર તૈયાર કરી આવક ઊભી કરવા નક્કી થયું છે.
મલ્ટિલેવલ કાર પાર્કિંગ તૈયાર થવાના છે તે જમીનની હાલની બજાર કિંમત આશરે 472.06 કરોડ થાય છે. પાર્કિંગ તૈયાર કરવા 344.19 કરોડનો અંદાજ મૂકવામાં આવ્યો હતો. કુલ પ્રોજેક્ટની કિંમત આશરે 816.25 કરોડ થતી હતી. હવે AMCએ મલ્ટિલેવલ પાર્કિંગની સાથેસાથે કોમર્શિયલ સેન્ટર તૈયાર કરી તેમાંથી 1000 કરોડની આવક ઉભી કરશે. જેમાં 10ને બદલે AMC બે માળનું પાર્કિંગ બનાવી આઠ માળમાં ઓફિસો-દુકાનો વેચશે.
ઉલ્લેખનિય છે કે સિંધુ ભવન, પ્રહલાદનગર ગાર્ડન, ચાંદલોડિયા અને રિવર ફ્રન્ટ ઈવેન્ટ સેન્ટર પાસે ત્રણ વર્ષ પહેલા 10 માળના મલ્ટિલેવલ કાર પાર્કિંગનો પ્લાન બનાવ્યો હતો. ચારેય લોકેશનની કુલ 28,695 જમીનનો ઉપયોગ મલ્ટિલેવલ પાર્કિંગ માટે થવાનો હતો. મ્યુનિ. ના ચારે પ્લોટ પ્રાઈમ લોકેશન ઉપર હોવાથી તેની કિંમત કરોડો રૂપિયા છે. તેની આવકમાંથી મેન્ટન્સનો ખર્ચ કાઢવો પણ મુશ્કેલ હોવાનો અંદાજ હતો. મ્યુનિ. એ અન્ય મલ્ટિલેવલ પાર્કિંગની આવક-જાવકનો સરવે પણ કરાવ્યો હતો. તેમાં મ્યુનિ. ને પાર્કિંગ ચલાવવા કોન્ટ્રાક્ટરો પણ મળવામાં મુશ્કેલી પડી રહી હતી. તેથી આવક ઉભી કરવા અમદાવાદ મ્યુનિસિપલ કોર્પોરેશને આ નિર્ણય કર્યો છે.
