ખાણીપીણી માટે જાણીતા સુરત શહેરમાં હવે આરોગ્ય વિભાગ પહેલી વાર નવતર પ્રયોગ કરવા જઈ રહી છે. અત્યારસુધી દંડની જ ભાષા સમજતી આરોગ્ય વિભાગની ટિમ હવે ગાંધીગીરી અપનાવશે. સુરત શહેરમાં લારી પર અને ખાસ કરીને ખાદ્ય પદાર્થ વેંચતા દુકાનદારો ગ્લવ્ઝનો ઉપયોગ નથી કરતા અને જોઈએ એવી ચોખ્ખાઈ પણ રાખતા નથી. અત્યાર સુધી સુરત મહાનગરપાલિકાના આરોગ્ય વિભાગ દ્વારા આવા લારી ગલ્લા ધરાવતા દુકાનદારો સામે દંડની કાર્યવાહી કરવામાં આવતી હતી.
આજથી હવે શાસકોએ દંડના બદલે પ્રેમથી જાગૃતતા લાવવાનો રસ્તો અપનાવ્યો છે. સુરત મનપાની આરોગ્ય સમિતિના ચેરમેન દર્શિની કોઠિયાએ મહાનગરપાલિકાના અધિકારીઓને સાથે રાખીને આ ઝુંબેશ અભિયાન શરૂ કર્યું છે. પરંતુ હવે આગામી દિવસોમાં દંડની જગ્યાએ પ્રેમથી સમજાવીને જાગૃતતા લાવવાનું આયોજન કરવામાં આવ્યું છે. આજથી આ ડ્રાઈવ ની શરૂઆત સેન્ટ્રલ ઝોનથી શરૂ કરવામાં આવશે.
પહેલા તબક્કામાં સેન્ટ્રલ ઝોનમાં ખાદ્ય પદાર્થ વેચતા લારી સંચાલકોમાં જાગૃતતા લાવવામાં આવશે. ખાદ્ય પદાર્થનું વેચાણ કરતી વેળાએ માસ્ક સાથે ગ્લવ્ઝ પણ જરૂરી છે તે સમજાવવામાં આવશે. આ ઉપરાંત લારીની આજુબાજુ સાફસફાઈ અંગે પણ તેઓને માહિતગાર કરવામાં આવશે. વધુમાં દરેક લારી ચાલકના વેક્સિનેશનના બંને ડોઝ ફરજીયાત લઈ લીધો હોય તેની પણ તકેદારી રાખવામાં આવશે. જો નહીં લીધા હોય તો બંને ડોઝ લેવા માટે જણાવવામાં આવશે.
લારી બાદ મીઠાઈની દુકાનો, બેકરીઓમાં, કરિયાણાની દુકાનોમાં પણ આ જ રીતે સમજણ આપવામાં આવશે. સેન્ટ્રલ ઝોનથી શરૂઆત કરાયા બાદ આ ડ્રાઈવ અંતર્ગત તમામ ઝોનમાં આ કામગીરી કરવામાં આવશે. પ્રાથમિક તબક્કામાં ઉધનામાં ભંડારી વાડ , કમાલગલીથી સાગર ચોક, રૂવાળા ટેકરામાં ખાઉધરા ગલી, મોટી ટોકીઝ, ગાંધી સ્મૃતિ ભવન પાસેથી તેની શરૂઆત કરવામાં આવશે. આ ડ્રાઈવ સમયે જે તે ઝોનના આરોગ્ય અધિકારીઓએ ફરજીયાત હાજર રહેવા પણ આરોગ્ય સમિતિના ચેરમેને આદેશ આપ્યો છે.
