CM રૂપાણીએ ટ્રાફિકના નવા નિયમો માટે આજે મોટી જાહેરાત કરી હતી. જેમાં RTO ને લઇ મહત્વના નિર્ણય લેવામાં આવ્યા છે. જે પ્રમાણે લોકોએ આજથી જ લર્નિંગ લાઇન્સ માટે આરટીઓ જવાની જરૂરી નહીં પડે. હવેથી રાજ્યની આઇટીઆઈ કચેરીઓ અને પોલિટેકનિકોમાં લર્નિંગ લાઇન્સ મળશે. આ ઉપરાંત રાજ્ય સરકારે તમામ ચેકપોસ્ટને 20મી નવેમ્બરથી હટાવી દેવાની જાહેરાત કરી છે. 25 નવેમ્બરના રાજ્યની 16 ચેકપોસ્ટો નાબૂદ કરવામાં આવશે. આ ચેકપોસ્ટની આવક 332 કરોડ છે જે હવે ઓનલાઈન સ્વીકારવામાં આવશે. વાહન માલિકો અને ટ્રાન્સપોર્ટરો કર અને ફીનું ચુકવણું parivahan.gov.in ઓનલાઈન કરી શકશે.
રાજ્યની 16 ચેકપોસ્ટો નાબૂદ
વિજય રૂપાણીએ જણાવ્યું હતું કે, સામાન્ય રીતે ચેકપોસ્ટો પર ઓવરલોડિંગ કે ઓવરડાઇમેન્શનની ચકાસણી થતી હતી. આ માટે સામાન્ય રીતે મોટી કંપનીઓના વાહનોએ દંડ ભરવાનો હોય છે. હવેથી તેઓ જાતે જ ઓનલાઇન અરજી કરીને દંડ ભરી શકશે. તેમના માટે આરટીઓ ખાતે ઓફલાઇન વ્યવસ્થા પણ ચાલુ રહેશે. જો આ લોકો ગુનો કરતા પકડાશે તો બે ગણો દંડ વસૂલ કરવામાં આવશે. સરકારના કહેવા પ્રમાણે રાજ્યની 16 ચેકપોસ્ટ પરથી સરકારને વર્ષે 300 કરોડની આવક થતી હતી.
લાઇસન્સ ITIમાં નીકળશે
મુખ્યમંત્રીના જણાવ્યા પ્રમાણે રાજ્યમાં દર વર્ષે 20 લાખથી વધારે લર્નિંગ લાઇસન્સ નીકળે છે. લર્નિંગ લાઇન્સ ફક્ત એક કોમ્પ્યુટર પરીક્ષા છે, જેમાં લાઇસન્સ મેળવવા માંગતા વ્યક્તિને ટ્રાફિકની વિવિધ સંજ્ઞાઓનું જ્ઞાન હોવું જરૂરી છે. આ ટેસ્ટ માટે ફક્ત કોમ્પ્યુટરની વ્યવસ્થા જરૂરી છે. આજથી રાજ્યની 221 આઈટીઆઈ અને 29 પોલિટેકનિક ખાતે લર્નિંગ લાઇસન્સ કાઢી શકાશે.
પાકા લાઇન્સ માટે નવી સિસ્ટમ
પાકા લાઇન્સ માટે બહુ ઝડપથી નવી સિસ્ટમ આવશે. આ માટે ટેન્ડર બહાર પાડી દેવામાં આવ્યું છે. આ સિસ્ટમમાં તમામ પ્રક્રિયા કોમ્પ્યુટરથી થશે. હાલની વ્યવસ્થામાં જે ખામી છે તે તેનાથી દૂર થશે.
ઓનલાઇન સાત સેવાનો ઉમેરો
મુખ્યમંત્રી વિજય રૂપાણીને જણાવ્યા પ્રમાણે ઓનલાઇન સેવામાં સાત સેવાનો ઉમેરો કરવામાં આવ્યો છે. જે પ્રમાણે ડુપ્લિકેટ આર.સી. બુક સહિતના કામો ઓનલાઇન થશે. લોકોએ કોમ્પ્યુટર પરથી જ અરજી કરવાની રહેશે.
આરટીઓ ઇ-ચલણ ડિવાઇસ અપાશે
ચેકપોસ્ટ દૂર કરીને વાહનોની તપાસ માટે ફ્લાઇંગ સ્ક્વોડ બનાવવામાં આવશે. આ ટીમમાં કામ કરતા આરટીઓ ઇન્સ્પેક્ટરોને દંડની રકમ ઉઘરાવવા માટે ઇ-ચલણ માટેનું ડિવાઇસ આપવામાં આવશે. દંડની રકમ ફક્ત મશીનથી જ ઉઘરાવવાની રહેશે. આ માટે કોઈ ટ્રાન્ઝેક્શન રોકડમાં નહીં થાય. સરકારે હાલ 350 હેન્ડ ડિવાઇસની ખરીદી કરી છે. આ ઉપરાંત પેટ્રોલિંગ માટે નવા 32 ઇન્ટરસેપ્ટર વાહનો ખરીદવામાં આવશે. આ વાહનોની જીપીએસથી ટ્રેક કરી શકાશે.
ટ્રક માલિકોએ નિર્ણયને આવકાર્યો
સરકારે ચેકપોસ્ટો નાબૂદ કરતા પહેલા ટ્રક માલિકો અને ટ્રક એસોસિએશનના લોકો સાથે બેઠકો કરી હતી. તેમણે સરકારના નિર્ણયને આવકાર્યો હતો. આ ઉપરાંત ગુજરાતમાં જે રાજ્યોમાંથી વધારે ટ્રક આવે છે તે રાજ્યોમાં પણ આવી બેઠકો કરવામાં આવી હતી. બેઠક દરમિયાન ટ્રક માલિકોને ઓનલાઇન દંડ સહિતની વસ્તુઓથી વાકેફ કરાયા હતા.
